Yn y golau hwn fe ddaw gwylanod
o rai o'r toeau i fomio'r tywod,
corws, wrth boeni ryw Sais a'i ddiod,
yn torri'u henwau'n y twrw hynod.
Ond a oes ryw synau'n dod o fan'cw
sy'n galw, galw o Gantre'r Gwaelod?

I’r meddyg, gorau moddion ydyw’r rhin
ddaw drwy addewidion,
ac i ŵr hoff y bêl gron,
gorau gôl, gôl y galon.

Ar welyau eu gorwelion eu heulwen
a hawliant yn brydlon.
Eu holl haf gânt yno'n llon
yn deulu o dywelion.