Er nad oes seren heno i'w gweled
Uwch Gwalia, er glawio
Dagrau gweld ei eisiau o,
Fe wn ei fod ef yno.

Mae'n oer, a minnau'n aros
yn y niwl ym mherfedd nos
a'r adar corff 'di gorffen
dod â'r byd a'i dwrw i ben;
hen leuad, ac mae'n glawio,
dw i'n glaf, ac mae'r dydd dan glo.

Mae hi'n oer, ac mae 'na wae
hŷn na cherrig yn chwarae
ar y cof rhyngof a'r hyn
a gredais, bob gair; wedyn,
heno, ym mhorth yr enaid,
curo'r wyf, curo o raid.

Mae'n oer, fe ddaw hi'n oerach;
ni ddaw neb drwy'r bore bach
at y drws tu draw i'r wawr,
yn union fel gwynt Ionawr.
Ac er i minnau guro,
ni ddaw neb i'w ateb o.

Yn llon heb Saeson fydd swyn
Aeddfed gefnogwyr addfwyn,
Canu mawl heb Sais diawl dig,
Uffernol Saeson ffyrnig.
Gwell fydd y gamp heb Lampard
A Rooney goch a’r hen gard,
Wylo’n grug, aflawen gri,
Y torrwyd calon Terry.
Yn nwyfus fydd Genefa,
Heb chwant Alys blant yn bla,
A Fiena yn feinwedd
Llawen haf yn llawn o hedd,
A heb bêl da gweld pylu
Yr anghymwys Loegrwys lu.
Y gêm honno gymhennaf
Pêl yw’r byd ar hyd yr haf,
Un gêm – Fehefin rwy’n gaeth
I’r Ewro Bencampwriaeth.

2.00 prynhawn Sul, Gorffennaf 20

Yn Nhŷ Siamas eleni NID yn y Clwb Rygbi.

Dyma’r tasgau:

Cwpled caeth yn cynnwys y gair 'bendigedig'.

Pennill telyn: 'Marian'.

Cân (heb fod dros 16 llinell) 'DNA'.

Cywydd byr (hyd at 6 llinell): 'Cadair Idris'.

Tasg fechan ar y pryd (Mi geith y beirdd ychydig funudau i wneud hon tra bydd y Meuryn yn malu).

Englyn yn cynnwys y llinell: 'Dirgelwch ydi'r galon'.

Limrig: 'Mi ddeffrais un bore yn sgwarnog...'

Croeso i bawb!