Yr Archif

'Diolwch yn fwndeli'; Sigârs Parry-Williams eto fyth!: Llion Jones

Dyma'r trydydd detholiad o'r englynion a chwpledi a luniodd T.H. Parry-Williams i ddiolch i'w gyfaill Huw T. Edwards am roddion o sigârs. (Dilyna'r dolenni i os wyt ti am weld y detholiadau blaenorol: Detholiad 1; Detholiad 2). Rydym bellach wedi cyrraedd gwaelod y bocs. 

Llinellau diolch am swp o sigârs

Daethant yn gwmni dethol - yn eu bocs.
O na bawn i'n tebol
I nyddu'n gynganeddol
Y mawl i Huw heb ddim lol.

Diolwch yn fwndeli *
Wr mwyn, am eu rhoi i mi.

* nodyn y bardd : pace Cynan

Englyn diolch am swp o sigârs

Gwir hwb i'r gwr o Aber - a bendith
Oedd bwndel mor syber.
Hen foi hynaws Y Faner,
Hael iawn wyt fel miliwnęr.

Englyn bach i ddiolch

Rhoes y Balkan Sobranie - imi nwyf
A mwynhad myn-brain-i
Yn eu mwg bu bron i mi
Hercian ar daith i Dwrci.

Englyn diolch

Sigârs! Sigârs lond parsel! - Calennig
Haelionus y Rebel,
Piti na chawn roi potel
I "Huw T." mewn rhyw hotel.

Englyn diolch am flychaid o sigârs godidog

Trugaredd trugareddau! - mi ges rodd
Megis rhin y duwiau,
Dwyres aur o drysorau
Oll yn help i'm llawenhau.

Englyn bach diniwed i ddiolch am swp o sigârs hyfryd

Y cyfaill triw, lwc ddiddiwedd - i chwi
Am eich holl hynawsedd.
Siriol wyf: rwy'n siwr o wledd,
A siwr iawn o serenedd.

Nodyn y bardd: "Yn ffodus, mewn un dimensiwn yn unig y mae'r cyfansoddiad uchod. Nid oes ynddo simbolaeth ddyrchafedig na delweddau diangof... Ni ellir galw'r cyfansoddiad yn soned, am beth amser o leiaf, nac yn bryddest ychwaith."

Englyn dyhuddiant

Huw T., rwyf wedi tewi - ers amser.
Simsan ydyw f'asbri.
Mawr, mawr yw fy nghamwri
Oddi mewn maddau i mi.