Beth yw natur heb furiau,
a’r gwyllt heb forder i’w gau?
Pa ryw ryddid oedd priddio
meini a gerddi dros go’;
rhoi baw anghofio ar ben
y gwaith fu yn Llangathen?

Lle canai Lewys, distaw
ydy’ Aberglasne’r glaw,
a’r naw gardd, yn sarn i gyd,
aneglur a mwsoglyd;
dan ddinad yn ddi-enw
a neb yn eu cerdded nhw.

Cof byr yw ein natur ni.
Mae amynedd mewn meini
i aros dan eu iorwg,
dan glo, am ddwylo a ddwg
raw a chaib i glirio chwyn:
dwylo â greddf i’w dilyn -
rhoi enw’n ôl i dir neb,
rhoi enw a gwarineb.

Yn rhydd ‘nawr y cerddwn ni
drwy Aberglasne’r glesni;
a rhwng meini gerddi gwâr
ymryddhau’r ym o’r ddaear.

 Mehefin 1999