Yr Alarch Ddu

(I Llion)

Iwan Llwyd

I ganol y plu gwynion
o ryw wlad i lawr y lôn,
y daeth i'r llyn dieithr, lleddf,
â chân yn un â chynneddf
yr adenydd trydanol,
a thorri craith roc a rôl
yn noeth fel jiwc bocs neithiwr,
ar dalcen diacen y dwr.

I ganol mordwy hwyaid
a brôl direol yr haid
y glaniodd, a'r gwylanod
a'u hiaith fain a goethai fod
aderyn wedi aros
a wnai ei nyth yn y nos,
â gwe fwy main nag awyr,
â dawn galetach na dur.

I ganol yr hesg anwar
a'r gwellt daeth swn curo gwâr
adenydd deryn dawnus
â'i grefft yn gwpled ar grys;
Jimi Hendrix yn jamio
yw llais ei linellau o,
ac awen lem John Lennon
yw'r dinc sydd yn gwanu'r don.