Llwydrew fel eiddew'r hen flwyddyn
ar y wal yn dal yn dynn,
anodd taenu menyn.

Dim sêr wrth odre'r rhaeadrau,
brwyn yn ffyn, hen bry'n ei ffau.
Anodd twymo neiniau.

Draw o'r Foelas i Drefelin
dreigiau cant o blant bach blin.
Anodd osgoi cennin.

Adeg ynfyd, coed eginfawr,
heddiw, a lliw hyd y llawr,
anodd cofio Ionawr

Cla'mai, pysgotwr yn clymu,
y cae'n haul, y gwcw'n hy'.
Anodd peidio gwenu.

Cau ymadael mae 'cymydog',
chwarae ar gwch, hwrê'r gog.
Anodd byw 'Motwnnog.

Chouchen, tafarn, haul Concarno,
agor y gwin, escargô.
Anodd dwad o'no

Yfed cwrw, trafod coron,
Iwan Llwyd yn nadu'n llon.
Anodd gwneud englynion.

Awn i wylio'r hen wenoliaid,
dyna nhw yn mynd yn haid.
Anodd ar fy enaid...

Y gwter yn tagu eto,
doleri Duw, dail ar do.
Anodd eu cribinio.

Haf yn pydru'n ddu dros ddaear,
clawr ar waun, coler ar war.
Anodd codi'n gynnar.

Twrci, grefi a goryfed,
y fo yn sleifio ar sled.
Hawdd iawn gwneud adduned.