Dydd Calan

Aron Pritchard

Stryd wag, a chaniau lager
yn bleth hyd y pafin blêr
o hyd, ac oglau chwydu
yn adwaith faith nos a fu.
Wele mae yr hen law mân
yn wylo dros dai Calan,
yno’n curo drysau cau
y gwelwon yn eu gwelyau.

 Nid yw bore’r hendre hon
yn gafael mewn atgofion
yn hir, ac wedi’i glanhau
yn siapus, bydd ei siopau
mewn anterth eto’n gwerthu
eu llwyth, o’r newydd, yn llu,
ac olion rhyw Nos Galan
yn y mwd, o dan law mân.

Ionawr 2002