A'r llinell bell bellach yn bod,
a'r cymylau'n ddyrnau o bapur lapio'n
cael eu cicio gan y gwynt,
fe wawriodd.
Agorwyd cist o aur ar y gorwel
a bwrwyd ohoni
gawodydd o ddiamwntiau
i'w hyrddio
gan chwerthin braf o'r gorllewin gwyllt.
A goleuadau'r Nadolig
yn cynnau dilyw o ddarnau aur wrth y ffenest
bydd trysorau'n lluwchfeydd hyd y lle
a chawodydd o berlau mān
yn byllau astud wrth y drws
yn gwrando ar raeadrau o aur ac arian byw
yn tincial o wydr i wydr.
A channwyll y dydd bron yn ei chwyr
cysgwch yn dawel
caewch eich cist
a'i hagor drachefn
rhwng dyddiau da a drycin
a chlosio
a ch'nesu
a chofio.
