Draw yn y dre
Mae ‘na fôr o fwrlwm
a phobl a’u ffags
a’u miri mân, draw yn y dre
yn chwydu pob llychedyn
prin o’u harian er mwyn prynu arwyr
a gêmau hoff y ‘bych’. Pa iws i Siôn Corn rhagor?

Ac erbyn dyfodiad ebrill a’i gawodydd
a Mai a’i oriau araul
i gysgodi lliwiau
gwyn y ‘dolig diwethaf,
ymhle mae’r arwyr i’w canfod?
Yn gweithio’u ffyrdd i gysgu dan
gwrlid llychlyd llwyd
yr atig. ‘Sneb yn becso dam am rheiny.
Caiff Barbie ac Action
Man eu rhoi i fyw mewn rhyw focs.
Daw rhai yn ôl ymhen blynyddoedd
Yn atgofion arswydus,
trig eraill yno.

Ac ymhle mae’r twrci yn y beibl?!
Bob blwyddyn, ceisia’r
twrcwn eto i hercian
heb obaith
rhag ffwrnesi’r mamau a’u bachau budron.
Stwffiwch y Nadolig !

A ddaw Action Man yn ôl cyn bo hir
megis Arthur i adfer gwir ystyr y Nadolig?
‘Does bosib fod yr ystyr
yn stwffiedig hefyd yn nyfnderoedd
ymysgaroedd y twrci druan.
Beth am y doethion?
Pwy sy’n cofio rheiny ynghanol miri
canol y dref? beth am
y baban Iesu a ‘u boenau oesol?..