Elen Mererid, Golan yn 18 oed

Mei Mac

Mae mileniwm o lonydd
yn dod i'n cwfwr' pob dydd,
lonydd y stadau glanwaith,
a lonydd y mynydd maith,
lonydd oer, lonydd araf
yn stremp o lanast' yr haf,
a sawl lôn fel rasal hir -
mae miloedd am a welir.
Ond Elen fwyn, daw lôn fach
a chwil, un heb ei chulach
yn y man, a hon i mi
yw'r lôn i'w chrwydro 'leni.
Dyma hen lôn barddoniaeth,
tramwy beirdd a phrifeirdd ffraeth,
lle ceir englyn pob munud
a chloddiau'n gywyddau i gyd.
Cyn bod y Sais, cyn bod sôn
am y derw'n ymdaro'n
y nos, uwchben ei ffosydd
y bu beirdd yn canu a bydd
y beirdd hynny, barddoniaeth,
a holl firi'r cerddi caeth
yn dal i hel hyd y lôn
tra môr yn taro Meirion.

Ar d'union o dir deunaw
i fro'r glêr, waeth befo'r glaw,
mentra i'r lôn sy'n mynd tua'r wledd,
a honno'n llawn cynghanedd,
a gyda hyn mi gei di
adenydd - beth amdani?