I Het y Llwyd

Twm Morys

Bu ymysg yr hetiau 'mhob man: - het wen,
Het wellt, het â rhuban,
Y tarbwsh coch, a'r tyrban.

Bonet yr Alban, y trilbi - di-lol,
Cap bêsbol, het bysbi,
A het y Pab, a'r topî.

Arbrofi â'r bere hefyd. - Trio het
Ar hap, a'i dychwelyd;
Trio y bu hetiau'r byd.

Trwy'r byd, roedd hetio ar ben,
Hasbin oedd y diddosben,
Oherwydd i'r dihiryn
Bara o hyd heb yr un,
A ninnau, bawb, yn y bôn,
Yn dynwared yn wirion.
Aeth hetiwr diarth ato
Isio parch i'r hen siapô:
'Mynna het ym Manhattan,
Het o well brîd, het lliw brân,
Het lliw'r glaw tywyll, a'r glo,
A phluen arni'n fflio.'
A dyna'r Llwyd amdani:
Y porc-pei ar y ciw-pi,
A phlu o hoff liw Iwan
Ymysg yr hetiau 'mhob man.