Yr wyf yn nabod prifardd
o dan het nad ydyw’n hardd,
Un gul ei hymyl yw hi
Hen benwisg sy’n ei boeni,
Heb na lliw na ruban llon
Hyd ei gwaelod digalon.
Mae hi’n bydew myn Dewi
Ma’n hen ond mae’i hangen hi’n
Het waith am gorun teithiwr,
Het arbed un trwbadwr
Rhag glaw mawr o Gilmeri.
Y mae hi’n nawdd am wn i.
Ond het dweud adnod yw hon
a moel yw ei hymylon.
Mae’n ddu fel y fagddu fawr,
Anial fel traethau Ionawr,
Het lom, gymhleth ei brethyn,
Fel het y Diafol ei hun,
Araith o het alaru,
Het blaen - heb rupunt o blu.
Ond dyma daflu pluen
At fardd pig i godi gwên:
Darn bach o farclod pioden,
Crys sidan yr wylan wen,
Tamaid o wasgod Tomos,
neu ran o wn crëyr y nos.
Un dydd, o’m herwydd, hwyrach
y daw’r bardd ar grwydyr bach
A’i het yn gwenu eto
Ar groen aur ei gorun o.
Ei wyneb fel ei benwisg,
Ei diwn cyn sionced â’i wisg,
Un bardd o’i gynffon i’w big
Yn harddach na’r hen Erddig.
