Yn nwr Awst Aberystwyth
berw'r lli sy'n bwrw llwyth
o ro mân o enau'r môr
yn gerrig ar y goror
a gemwaith cain y gwymon
yn y dwr sy'n harddu'r don.

Hon yw'r gefnlen eleni
a chlywn gloch eich uno chi
yn datgan y gân ar goedd
mai chi yw miri'r moroedd:
chi'ch dau yw harddwch y don
a cheinder gwych y wendon,

chi'r awel dros yr heli,
chi'r glasddwr sy'n llanw'r lli,
chi yw pwer y cerrynt
a rwyga'r graig ar ei hynt
yn ro mân ar draethau'r môr,
yn rhesi cain o drysor.

Wedi'r "Gwnaf", bydd haf o hyd,
pob gaeaf yn haf hefyd:
un haf fel mil o hafau
yn dal i gynhesu dau;
rhyw hir haf drwy'r tonnau rhwyth
yn nwr Awst Aberystwyth.