Yn nhir gaea'n dragywydd - heno 'nghwsg
Yng nghysgod y mynydd,
Yn y ddôl un Siriol sydd
Yn ei hafan yn ufudd.

I wyddfa ger ei anheddfan - rhoed hi;
Rhoed taw ar ei thuthian
Ni chlywn Llew heno'n mewian
Ei 'helo' wrth Siriol Ann.

Un ffyddlon oedd hon heb ei hail - angel
Eu hangau fel bugail
O nefoedd yr anifail
Ddaw i'w dwyn o fedd y dail.

Oes o hanes sy'n atseinio - hanes
Am ninnau'n ei mwytho;
Hanes cynnes yn ein co'
Yw hanes Siriol heno.