Te

Aneirin Karadog

Te o’r ne’ a’i anian iach,
Gêr i rafin fyw’n gryfach
A gyrru’n gawr lawr y lôn,
Y greal i’r goreuon,
Ateb hud i’r to pwdwr
(Byr yw’r dasg rôl berwi’r dwr)
Trwy bob awr, tra bo bore,
Bob cyfle - disgled o de!
Y ffisig i bob ffyswr
Rhag pob lol, hen ddwyfol ddwr,
Cwpanig nid yw’n ddigon -
‘Mond llond lle o de yn don,
Rhaid wrth laeth a rhaid wrth li
A’i lanw i ‘modloni!
Ffynnon loyw, dw^r croyw cred,
Dwr Sycharth i drai syched,
I’r cur yn ninistr curry
Neu chow-mein bydd chai i mi.

 Te o fudd, mêt i feddwon -
Te’n lle’r gwydraid, llymaid llon,
Te â’i haf ar y tafod,
Te fy myw yn toi fy mod,
Te yw’r hit i arwr hardd,
Te prifiant, high pob prifardd,
Te cynnes ymhob tywydd,
Te i’r galon, ffynnon ffydd,
Tardd i’r corff yn treiddio’r co’,
Te o ‘mhair eto i ‘mhuro.

Chwefror 2004