Mynd am Adref ar y Traws Cambria

Aneirin Karadog

Awelon Gwydion a chwyth drwy'r goedwig
yn hon fe dry'r holl gwynion yn ganig,
yn alaw y coed rwy'n ymlaciedig
dan yr haul a'i nodau lu'n enwedig,
yma'n hogi'r dychymyg am hydoedd -
wele oludoedd sy'n anweledig!

Yng nghangennau hedd fy nghynganeddion
fe gaf ryddid ymysg cyfareddion
yn fy syched i yfed o'r afon,
adar a'u sain sy'n rhaeadr swynion,
ynof mae'r llif atgofion yn nentydd;
haf mor ddedwydd fel byd fy mreuddwydion.

Haf hir yn llawn cyfaredd - mewn llesmair
ar y gwair yn gorwedd,
y llinellau yn allwedd
i'r drws - o'i throi daw'r hedd.

Nawr â glaw'r gaeaf o hyd heb glirio
a thynfa hen hiraeth yn fy nharo
ar fws anobaith rwy'n teithio'r lonydd - 
â ffydd daw'n ddiwetydd o ha' eto.

Mawrth 2001