‘Colloquial Czech’ ydy enw
y gyfrol sy’n cynnwys y cwrs
sy’n llawn ymadrodion defnyddiol
os wyt am berffeithio dy sgwrs:
Fy enw yw Rostislav Beneš.
‘Rwy’n dyfod o Frýdek-Mistek.
Mae ‘ngwraig i’n Americanes.
Dwi’n dysgu deud celwydd yn Tsiec.
Bob nos ‘rwy'n ymarfer pêl-foli.
Mae Vladimir Smicer yn ffrind.
‘Sdim Comiwnydd yn y llywodraeth,
nawr fod yr holl Rwsiaid ‘di mynd.
Mae slívovice’n help i mi gofio,
o’i lowcio fo lawr fesul clec.
Mae cwrw cry’n well i dy iechyd.
Dwi’n dysgu deud celwydd yn Tsiec.
Hen w^r wyf sy’n hoff o ysmygu.
Mae yngan c'tvrt yn reit hawdd.
Mae Ostrava’n bentre’ bach distaw.
‘Sdim modd creu celfyddyd heb nawdd.
Caed gwared ar bob gwrth-semitiaeth.
Ddydd Llun wnes i bostio y siec.
Dwi ’di dioddef er mwyn fy marddoniaeth.
Dwi’n dysgu deud celwydd yn Tsiec.
Mae’r trên yn ymadael yn brydlon.
Nid oes ar wleidyddion ofn gwaith.
Mae Cymru yn llawn beirdd talentog,
heblaw’r rhai sy’n medru’r ddwy iaith.
Blinderus yw teithiau barddonol.
Nid fi a ollyngodd y gnec.
‘Roedd Kafka’n foi iawn oddi tanodd.
Dwi’n dysgu deud celwydd yn Tsiec.
Jmenuju se Rostislav Beneš.
Hraju volejbal rád.
Moje zena je americ'anka.
Uc'ím se c'esky lhát.
Dywedais anwiredd ym Mharis
ac ambell un bach yn yr Hâg,
ym Mosco, Berlin a Fienna,
ond dwi’n palu celwyddau ym Mhrâg.
