Blewyn o hyn yw anian
fy myw, a rhyw hel yn rhan
o'r troedio, camu'r tridiau
i lawr pob awr ar draeth y bae.

O'r glannau cri'r gwylanod dros liwiau
darnau ola'r diwrnod,
a fi'n ateb, heb wybod,
"Mi fydd y dydd eto'n dod."

Fy nghalon yn briwio'n braf
dan awen heulwen olaf -
dy lonydd di'n dadlennu
llan y fan ynof a fu.

Dychwel yn dawel yw'r don ar y lli
ei ddwr llawn atgofion,
yn ôl ar hyd ymylon
tragwyddoldeb wyneb hon.

Am dridiau, nid llwm droedio
gariodd hwn a ganodd go'
o nofio yng nglas nefoedd
yn rhan oll o'r hyn yr oedd.

Anogai ei fwythau'r eigion - Beuno
beunydd yn creu crychion
â'i law. Daw pob un yn don
i dorri'n Aberdaron.