'Twm 'di marw' medd Meirion

Twm Morys

Un Mac oedd ddigon i mi,
Mac yn cymryd y mici.
Mac ddaru landio acw
Gyda hers, fel gwdihw;
Yn galw gefn dydd golau,
 chist yn barod i'w chau.

Meirion yr Ymgymerwr
Mawr ffraeth, cyhyraeth o wr,
Ar ben arch, a deufarch du
O Annwn yn ei thynnu,
Yn rhoi i bawb wâdd i'r claddu,
A minnau, Twm, yn y ty;!

Er fy mod yn fy mlodau,
Ac yn iach fel cant o gnau,
Yr oedd rhyw feirdd ar fy ôl
Yn udo yn farwnadol:
"Nid crys sy am Morys mwy,
Ond amdo'n Llanystumdwy."

Cyn i ti, y Macyn Tair,
Godi dy drydedd gadair,
Byddaf ar fy mhedwaredd,
Er fy mod dan ro fy medd.
Marw neu beidio, Meirion,
Bardd ydi bardd yn y bôn.