Wedi derbyn cais i gyfansoddi englyn ar achlysur penblwydd perchennog y plas/gwesty lleol. HELP!!!!

Dy gamp sydd o dy gwmpas - yn mwytho
A maethu Cymdeithas,
Rhown ddiolch myrdd ac urddas
I gawr y plwyf, gwr y Plas.

Ydi'r gynghanedd yn gywir?
Sut fedrai wella arno?
A ddylwn i - fel Cadi Ffan - gynnig rhoi'r ffidil yn y to?!!!


...angen ymateb ar frys - mae'r penblwydd ar ddydd Mawrth!!!!!!

Yn sicr, does dim angen meddwl am roi'r ffidil yn y to - mwy nag y dylai Cadi chwaith o ran hynny.

Hyd y gwela' i, y mae'r englyn yn gwbl gywir.Mae'r unig anawsterau rydw i'n eu gweld yn rhai gramadegol rhagor na chynganeddol.

I fod yn bedantig, 'O'th gwmpas' sy'n gywir nid 'o dy gwmpas'.
Hefyd mae 'diolch myrdd' yn fy nharo i'n od.

Fe fyddai 'cymwynas' yn odl fach handi os wyt ti am newid unrhyw beth.

Ydi hwn yn well ynte?

T^wr ydyw g^wr y gwesty - yn biler
I Balas y Tywi,
Meistr y gwyl a'r gwely,
A'r croeso'n don yn ei d^y.

A diolch O GALON am y cyngor!

Titw Bach a ysgrifennodd:
Ydi hwn yn well ynte?

Yn anffodus, nac ydy! Mae 'na ddwy linell gywir a dwy linell wallus.

"T^wr ydyw g^wr y gwesty"

Yn y patrwm anghytbwys disgynedig, dydy'r gyfatebiaeth rhwng 'gŵr' a 'gwesty' ddim yn gywir gan fod 'r' ar ôl yr acen yn 'gŵr' a 'st' yn 'gwesty'. Mae angen rhywbeth fel 'gyrru' i greu cyfatebiaeth gywir gyda 'gŵr' a rhywbeth fel 'gist' i gyfateb i 'gwesty'.

" - yn biler
I Balas y Tywi,"

Cywir

"Meistr y gwyl a'r gwely,"

Er bod 'gwyl' a gwely' yn creu cyfatebiaeth gywir, mae 'meistr' heb ei ateb. Un datrysiad posib fyddai creu cynghanedd sain trwy gael gair sy'n odli gyda 'gwyl' yn lle 'meistr'

"A'r croeso'n don yn ei d^y."

Cywir eto.

Gobeithio bod hyn o ryw gymorth.

Mi fyddwch yn falch o glywed 'mod i'n bwriadu mynd i ddosbarthiadau nos dros y gaeaf - yn lle 'mod eich mwydro chi bob munud!!!!

Yn ôl at yr englyn cyntaf - 'dwi wedi dod i'r penderfyniad bod "o dy gwmpas" yn dderbyniol gan mai englyn yw hwn i un gogleddwr gan ogleddwr arall, a'r ddau ohonom yn byw yn nyfnderoedd y De - ac "o dy gwmpas" fyddai'r ddau ohonom yn dweud yn Sir Fôn a Sir y Fflint!

Er i mi botsian gyda'r gair "cymwynas" cyn cwblhau'r englyn, mae'r gair "urddas" yn mynd i blesio'r g^wr boheddig penodol hwn tu hwnt i bob amgyffred!

Felly dyma'r englyn terfynnol......Oh my God - bydd rhywbeth arall yn anghywir 'rwan!!!!? Os oes - dwedwch!

Dy gamp sydd o dy gwmpas - yn mwytho
A maethu Cymdeithas,
Rhown freintiau fyrdd ac urddas
I gawr y plwyf, G^wr y Plas.

Dwi wedi gweld merched yn cael babis gyda llai o boen na hyn!!!!!